રેખ્તા
હિન્દવી
સૂફીનામા
રાજસ્થાની
સમયનુ સોનું
samayanu sonun
પ્રિયકાન્ત મણિયાર
પ્રિયકાન્ત મણિયાર
હવે આ હાથ રહે ના હેમ!
મળ્યું સમયનું સોનું પરથમ વાવર્યું ફાવ્યું તેમ;
હવે આ હાથ રહે ના હેમ!
બહુ દિન બેસી સીવડાવ્યા બસ કૈં નવરંગી વાઘા,
સાવ રેશમી ભાતભાતના મહીં રૂપેરી ધાગા;
જેહ મળે તે દર્પણ જોવા વણલીધેલે નેમ!
હવે આ હાથ રહે ના હેમ!
ભરપોરે ભેાજનઘેને નિતની એ રાતોમાં,
ઘણુંખરું એ એમ ગયું ને કશું કૈક વાતોમાં;
પડ્યું પ્રમાદે કથીર થયું તે જાગ્યોયે નહીં વ્હેમ!
હવે આ હાથ રહે ના હેમ!
કદી કોઈને કાજે નહીં મેં કટકોયે એ કાપ્યું,
અન્ય-શું દેતાં થાય અમૂલખ મૂલ્ય નહીં મેં માપ્યું;
રતી સરીખું અવ રહ્યું એનો ઘાટ ઘડાશે કેમ?
હવે આ હાથ રહે ના હેમ!
સ્રોત
- પુસ્તક : સ્પર્શ (પૃષ્ઠ ક્રમાંક 41)
- સર્જક : પ્રિયકાન્ત મણિયાર
- પ્રકાશક : સ્વાતિ પ્રકાશન
- વર્ષ : 1966