રેખ્તા
હિન્દવી
સૂફીનામા
રાજસ્થાની
સલામો
salamo
ઝવેરચંદ મેઘાણી
ઝવેરચંદ મેઘાણી
સલામો કરું બીજના ચાંદને
સલામો જમીં આસમાં હો તને!
સલામો ચમનને ને વેરાનને
ઉછેર્યો તમે એક ઇન્સાનને.
દીઠાં છે ન કાશી કે કાબા અમે,
કુરાનો પુરાણો પઢ્યાં નૈ અમે,
ન નાપાક કે પાકના ભેદની
કિતાબો અમે ઉમ્રભરમાં ભણી.
અમે જે હતા ઢૂંઢતા તે જડ્યું
અહીં એક ઇન્સાનને દિલ ભર્યું
નયન નીતર્યું ને સબકથી સર્યું
નૂરે-વસ્લ : એણે વતનને ધર્યું.
અમો મિસ્કિનોને શી દૌલત મળી!
ગરુરી વધી નૈ, ગઈ ઓગળી.
હતા કંજૂસો કાળજૂના અમે,
ગયા વીફરી, રે ફના કાં ગમે!
સ્રોત
- પુસ્તક : સોના નાવડી (પૃષ્ઠ ક્રમાંક 70)
- સંપાદક : જયંત મેઘાણી
- પ્રકાશક : ગુજરાત સાહિત્ય અકાદમી
- વર્ષ : 1997