સખી શ્યામને મળ્યાની હોંસ મનમાં જો;

વ્હાલાજીની વાજે વેણુ આજ વનમાં જો!–સખી૦–ટેક

એવી વાંસળી સુણીને ફુલે છાતડી જો;

આવે યાદ શરદપુનેમ કેરી રાતડી જો!–સખી શ્યામને૦

હોય પાંખ તો ઉડીને જઈયે આ ઘડી જો;

અરે વ્રજવધૂને પાંખ કેમ ના ઘડી જો?!–સખી શ્યામને૦

વશીકરણ ભરી વ્હાલાજીની વાંસળી જો;

સ્વર સૂણતાંમાં ઠામ ન રહે પાંસળી જો!–સખી શ્યામને૦

વિરહ ભર્યો મધુર મોરલીનો સૂર છે જો;

એ તો વિવ્હળ કરે વનીતાનાં ઊર છે જો!–સખી શ્યામને૦

સુઝે કામ કાજ નાજ કશું ઘર તણું જો;

નથી ભાન રહેતું લોક લાજને ઘણું જો!–સખી શ્યામને૦

જઈ કુંજમાં મોહનજીને ઝાંખિયે જો;

પરીપૂર્ણ આજ પ્રેમરસ ચાખિયે જો!–સખી શ્યામને૦

ખરો પ્રેમરસ ભોગિ છે એ છેલડા જો;

હૃદયમળમાં રમી રહ્યો અલબેલડો જો!–સખી શ્યામને૦

સખી સાથ ગોપિ મધૂવન નીસરી જો;

નિર્ખિ નટવર, ઘર કેરિ વાત વીસરી જો!–સખી શ્યામને૦

રસિકરાય કહે કેમ આવિ ગોપિકા જો;

ગોપિ કહે કહાંન જાણિ કાં કરો ટિકા જો?!–સખી શ્યામને૦

વ્હાલે ઇચ્છા કીધી પૂર્ણ વ્રજનારની જો;

બલિહારિ વિજય ન્યારિ કુંજવિહારની જો!–સખી શ્યામને૦