સાચકલું મ્હાલ્યાં’તાં

પિકનિકમાં આપણે પાંચવાર ગ્યાં’તાં

પણ પિકનિકમાં પહોંચ્યાં’તાં એકવાર...

એકવાર આપણે સાચુકલું મ્હાલ્યાં’તાં

સાચુકલું મ્હાલ્યાં’તાં એકવાર

એકવાર આંખોએ જોયું છે એટલે

બસ મેઘધનુષ્ય મનમાં ચીતરાતું

સાચું કહું તો આજ આખું યે આભ

મારી ઉપરથી દૂર સરી જાતું

આભનો ઉમંગ કોઈ મનનો તરંગ થઈ

ઉડતો જોયો છે મેં એકવાર...

એકવાર ઉડે છે જે કોઈ આકાશમાં

એને પાંખોનુ ફૂલ ખીલે

જેને ઉડવાનું ફૂલ ખીલે એ માણસને

એવું કોણ હોય જે ન ઝીલે?

ઝીલેલું હોય જેણે આખું આકાશ

એને આખું આકાશ ગમે એકવાર

sachakalun mhalyan’tan