રૂંધાતા આવકારનું ગીત

ઉંબરમાં રૂંધાતા મીઠેરા આવકાર

આવતલ, ઉતાવળ્યું પલાણજો!

પાંખડીને જાગી છે ઝંખના પતંગિયાની

વ્હેલું પરભાત ભેળું આણજો!

આંગણે ઊગેલ હોઉં બોરસલ્લી એમ

જાય સુગંધી દંન મારા ખરતા!

અગરુની અમળાતી સોડમમાં આમતેમ

સોણાં મેળાપનાં ય તરતાં!

ડેલીમાં અકળાતા જોણાની હદમાં બે

મોજડીની છાપ પાડી જાણજો!

ફળિયું ચીતરીને ઊડી જાતા અંકાશ

એ નથી કપોત – ભોળા ઓરતા!

આખા મલકને લાવે મારગ—

નથી અલબેલાં ડગલાંને દોરતા!

ખેંચાણી ખૂખ જાળી પાતળી જુદાઈની

હવે તૂટી જાય એમ એને તાણજો!

ઉબરમાં રૂંધાતા મીઠેરા આવકાર

આવતલ, ઉતાવળ્યું પલાણજો!

rundhata awkaranun geet