– nii ukti - Geet | RekhtaGujarati

– ની ઉક્તિ

– nii ukti

જગદીશ જોશી જગદીશ જોશી
– ની ઉક્તિ
જગદીશ જોશી

અણગમતું આયખું લઈ લ્યોને, નાથ!

મને મનગમતી સાંજ એક આપો :

કે ક્યારનો મૃગજળમાં ઝૂરતો તરાપો…

ખરી પડ્યાં પાંદડાંને હાથમાં લઈને

મેં આંખોમાં રોપ્યું એક ઝાડ :

પંખીનાં લાડ કદી નીરખ્યાં નથી

કે નથી સાંભળ્યો મેં નભમાં ઉઘાડ.

થીજેલાં જળમાં સૂતેલી માછલીને

અર્જુનનો મત્સયવેધ આપો.

મને આપો એક સાંજ, મને આપો એક રાત

મને આપો એક એવો આશ્લેષ

ફરફરવા લાગે સાત સાત જન્મોના

તાણીને બાંધેલા કેશ!

મારાથી સાવ મને અળગી કરીને નાથ,

કાયમની કેદ મને આપો!

સ્રોત

  • પુસ્તક : ધારો કે એક સાંજ આપણે મળ્યા... (પૃષ્ઠ ક્રમાંક 213)
  • સર્જક : જગદીશ જોષી
  • પ્રકાશક : ઇમેજ પબ્લિકેશન્સ
  • વર્ષ : 1998