રેખ્તા
હિન્દવી
સૂફીનામા
રાજસ્થાની
ઝવેરચંદ મેઘાણી
હાં રે એક રૂડો
ભાભીના ભાલ કેરી એ ટીલડીનો રાતુડો રંગ,
હાં રે બીજો રૂડો
વીરાની શૌર્યઘેરી બે આંખડીનો રાતુડો રંગ.
હાંરે એક રૂડો
માવડીને મીઠે સેંથે ભરેલ રાતુડો રંગ,
હાં રે બીજો રૂડો
બાળુડી બહેન! તારે હોઠે ઝરંત રાતુડો રંગ.
હાં રે એક રૂડો
શૂરવીરના જખમના શોણિત તણો રાતુડો રંગ,
હાં રે બીજો રૂડો
પરદેશ જતા પિયુજીની પ્રીત તણો રાતુડો રંગ.
હાં રે એક રૂડો
વરલાડી! તારી સોહાગણ ચૂડલીનો રાતુડો રંગ,
હાં રે બીજો રૂડો
વનની ચણોંઠડીનો હીંગોળભર્યો રાતુડો રંગ.
હાં રે એક રૂડો
સહિયર તણી હથેળીમાં મેંદીભર્યો રાતુડો રંગ,
હાં રે બીજો રૂડો
સંધ્યાને હૃદય સળગી રહેતો મધુર રાતુડો રંગ.
હાં રે એક રૂડો
કન્યાને હાથ રમતી કંકાવટીનો રાતુડો રંગ,
હાં રે બીજો રૂડો
બજરંગની ધજાનો ગગને ઉડન્ત રાતુડો રંગ.
હાં રે મને રૂડો
પરભુજીનો સૃજેલો સંસારે સર્વ રાતુડો રંગ,
હાં રે એક કૂડો
ક્રોધાળ માનવી કો જીભ તણો રાતુડો રંગ.
સ્રોત
- પુસ્તક : સોના નાવડી (પૃષ્ઠ ક્રમાંક 216)
- સંપાદક : જયંત મેઘાણી
- પ્રકાશક : ગુજરાત સાહિત્ય અકાદમી
- વર્ષ : 1997