રેખ્તા
હિન્દવી
સૂફીનામા
રાજસ્થાની
રાણાનો રંગ
ranano rang
દેવજી રા. મોઢા
દેવજી રા. મોઢા
રાણાનો રંગ મને લાગ્યો ન લાગ્યો
ત્યાં કા’નાનો રંગ ગિયો લાગી!
ને કાયામાં કામ હજી જાગ્યો ન જાગ્યો
ત્યાં રુદિયામાં રામ ગિયો જાગી!
માડીની સાથ હું તો માજોલીમાં બેસીને
મંદિરિયે રોજરોજ જાતી,
ને નેણની કટોરી ભરી સાંવરિયો પીઉઃ
એની મસ્તીમાં થાઉં મદમાતી;
પીતાં ધરાઉં નહિ પાણીથી પાતળિયો
બાંકે બિહારી વરણાગી!
રાણાને હાથ મારો સોંપ્યો ઈ પ્હેલાં
મેં કાનાને હૈયું દીધ સોંપી;
ને પ્રીત્યુંની વેલની ના ધરતી બદલાય,
ઈ તો એક થળે રોપી ઈ રોપી!
કા'ન જેવા કંથડનાં કંકણ પ્હેરીને
હું તો થૈ ગૈ છું અમ્મર સોહાગી!
સ્રોત
- પુસ્તક : ઉત્તરાયણ (પૃષ્ઠ ક્રમાંક 29)
- સંપાદક : દીપક મહેતા
- પ્રકાશક : નેશનલ બુક ટ્રસ્ટ, ઇન્ડિયા
- વર્ષ : 2008