રેખ્તા
હિન્દવી
સૂફીનામા
રાજસ્થાની
પૂનમનો નોક
Punam no Nok
વેણીભાઈ પુરોહિત
વેણીભાઈ પુરોહિત
ઢોલ ઢમક્યાં ને ધરતી ધમધમી,
મારો મઘમઘ ભીનો ચોક :
ઊંચે ઊંચે ચાંદલિયો આભમાં
અને નીચે પૂનમિયાં લોક :
સહિયર! વાગે તે મીઠી મીઠી મોરલીo
સખી! કાંબી ને કડલાં રુમેઝુમે
કાંઈ નકવેસરનો ઝોક :
મેં તો ગુપચુપ જોયું દર્પણમાં
હાંરે લટકું લઈ ગઈ ડોક :
સહિયર! વાગે તે મીઠી મીઠી મોરલીo
સખી! આંખોમાં આંજણ અમાસનાં
અને પંડે પૂનમનો નોક :
અલી, આવી ચંડે જો મારો સાહ્યબો
એને આઘેરો ઓશરીમાં રોક :
સહિયર! વાગે તે મીઠી મીઠી મોરલીo
સ્રોત
- પુસ્તક : દીપ્તિ (પૃષ્ઠ ક્રમાંક 109)
- સર્જક : વેણીભાઈ પુરોહિત
- પ્રકાશક : વોરા ઍન્ડ કંપની પબ્લિશર્સ પ્રાઇવેટ લિમિટેડ, મુંબઈ
- વર્ષ : 1956