અડધી રાતે ખડકી ખોલી ઊભી સાંકળ ઝાલી,

શેરીના સૂનકારે મુઈ સુધબુધ નીકળી હાલી.

આંખ ઉલાળી એણે કીધું

આવું છું રે હમણા;

ભણકારા જંપવા ના દે તો

ક્યાંથી આવે સમણા;

વા કરે જ્યાં અટકચાળો ત્યાં મલકું ઠાલી ઠાલી...

અડધી રાતે ખડકી ખોલી ઊભી સાંકળ ઝાલી,

દિ આખોયે અડખે પડખે

અંદેશે વરતાય;

રાત પડે પડખાંમાં

આવી છેક ભરાય;

અલી, અટકળે ઓવારું તો હોય પથારી ખાલી;

અડધી રાતે ખડકી ખોલી ઊભી સાંકળ ઝાલી,

શેરીના સૂનકારે મુઈ સુધબુધ નીકળી હાલી.