રેખ્તા
હિન્દવી
સૂફીનામા
રાજસ્થાની
રાજ તમે નમણાં નેણેથી મને જોઈ
raaj tame namnaa nenethii mane joii
રાહુલ શ્રીમાળી
રાહુલ શ્રીમાળી
રાજ તમે નમણાં નેણેથી મને જોઈ
હું રે ઊભી'તી મારા મનગમતા સપનાની
રાત્યુમાં મનડાંને પ્રોઈ.
દાડો ઉગેને મારાં ફાટ ફાટ હૈયામાં
જોબનિયું હિલ્લોળા લેતું,
અચરજની શૂળ જેવું દલડે ભોંકાઈ
કૂણી અવઢવની વાચાને કે'તું.
અણદીઠાં ઓરતાંને વાખીને જાઉં ત્યાં તો મારતું ટકોરા મને કોઈ
રાજ તમે નમણાં નેણેથી મને જોઈ.
કોરી ધાકોર સાવ સુક્કી નદીમાં
ફરી ચોમાસુ આવી ઉભરાય,
લીલાં કુંજાર સાવ બેઉં કાંઠાએ
પછી લ્હેરખીની ભાત્યું ભરાય
આરસીમાં પોતાને જોવામાં મૂઈ મેં તો મદમાતી મૌસમને ખોઈ
રાજ તમે નમણા નેણેથી મને જોઈ.
સ્રોત
- પુસ્તક : કવિ તરફથી મળેલી કૃતિ