રેખ્તા
હિન્દવી
સૂફીનામા
રાજસ્થાની
પડછાયો
padchhayo
પિનાકિન ઠાકોર
પિનાકિન ઠાકોર
કયે ઘૂમટે મુખડાં તેં ઢાંક્યાં,
સોનલ હું તો છેતરાયો;
કઈ રેખાએ ચિત્તર આંક્યાં
સ્નેહલ ભોળો ભરમાયો. – કયે૦
હું તો જો’તો જો’તો ને રહ્યો મ્હોતો,
જગાડી પ્રીત પરવશ નાખી;
હૈયું ખોતો ખોતો ને ન’તો જો’તો
લગાડી માયા અણજાણ રાખી;
ક્યું તીર તેં કાળજે તાક્યું?
ઘાયલ હું વણવાગ્યો! – કયે૦
હું તો પીઉં પીઉં ને તો ય તરસ્યો,
અખૂટ પ્યાસ પીવડાવી જાણે.
હું તો કોરો કોરો ને કયો વરસ્યો.
અદીઠ મેહ ભીંજાતા પ્રાણે;
મન ભટકે ઝંખે વણથાક્યું
પાગલ, તારો પડછાયો. – કયે૦
સ્રોત
- પુસ્તક : કાવ્યગુર્જરી (પૃષ્ઠ ક્રમાંક 89)
- પ્રકાશક : મધુસૂદન વૈદ્ય, આચાર્ય, મ. મા. પ્યુપિલ્સ ઓન સ્કૂલ
- વર્ષ : 1964