રેખ્તા
હિન્દવી
સૂફીનામા
રાજસ્થાની
અજવાળું
ajvaaLun
માધવ રામાનુજ
માધવ રામાનુજ
અંદર તો એવું અજવાળું અજવાળું...
ટળવળતી હોય આંખ જેને જોવાને
એ મીંચેલી આંખેયે ભાળું!
અંદર તો એવું અજવાળું અજવાળું...
ઊંડે ને ઊંડે ઉતરતા જઈએ ને તોય
લાગે કે સાવ અમે તરીએ,
મરજીવા મોતીની મુઠ્ઠી ભરેને, અમે
ઝળહળતા શ્વાસ એમ ભરીએ!
પછી આરપાર ઊઘડતાં જાય બધાં દ્વાર-
નહીં સાંકળ કે ક્યાંય નહીં તાળું...
અંદર તો એવું અજવાળું અજવાળું!
સૂરજ કે છીપમાં કે આપણામાં આપણે જ
ઓતપ્રોત એવા તો લાગીએ-
ફૂલને સુવાસ સ્હેજ વાગતી હશેને, એવું
આપણને આપણે જ વાગીએ!
આવું જીવવાની એકાદ પળ મળે... તો એને
જીવનભર પાછી ના વાળું!
અંદર તો એવું અજવાળું અજવાળું!
સ્રોત
- પુસ્તક : અક્ષરનું એકાંત (પૃષ્ઠ ક્રમાંક 59)
- સર્જક : માધવ રામાનુજ
- પ્રકાશક : રંગદ્વાર પ્રકાશન
- વર્ષ : 1997