રેખ્તા
હિન્દવી
સૂફીનામા
રાજસ્થાની
પોઢણપનોતા
poDhanapnota
હીરાબેન પાઠક
હીરાબેન પાઠક
રે ઘટઘટ વાસ વસંતા
પ્રભુ! જાગો પોઢણપનોતા
મુજ જંતર આ વાજંતાં. - પ્રભુ! જાગો.
બ્રાહ્મમુહૂર્તને મંગલ પ્રહરે,
ઘંટારવની ગહરી લહરે,
આતમ સાધે સુરતા – પ્રભુ! જાગો.
નોબત ગાજે ઝાલરું બાજે,
આરતી લળીલળી નાચે,
મંગલ સાજ સુહાતા. – પ્રભુ! જાગો.
દૂરદૂર દરિયાવતણાં જલ,
બંદીજનની જાણે બિરદાવલ!
ઊમટી ઊલટભર ગાતા – પ્રભુ! જાગો.
જાગી પ્રભુ, સામું મુજ જોજો
ભવભવની આરત મીટવજો,
લોચન આંસું લ્હોતાં – પ્રભુ! જાગો.
અપૂરવ સૂર અતલને તાગે,
અંતરનું જંતર એમ વાગે,
દ્યો વરદાન, વિધાતા! – પ્રભુ! જાગો.
પ્રભુ જાગો પોઢણપનોતા,
મુજ વ્હાલા પ્રભુ!
જાગો પોઢણપનોતા.
સ્રોત
- પુસ્તક : આપણી કવિતાસમૃદ્ધિ (ઉત્તરાર્ધ) (પૃષ્ઠ ક્રમાંક 121)
- સંપાદક : ચન્દ્રકાન્ત ટોપીવાળા
- પ્રકાશક : ગુજરાતી સાહિત્ય પરિષદ
- વર્ષ : 2004