પોઢણ દીધાં મખમલનાં...

પોઢણ દીધાં મખમલનાં ને નીંદર દીધી નંઈ,

સખી! હું સોળ વરસની થઈ…

કમખો માગે પતંગિયાં ઓઢણિયું માગે મોર,

અવસર વરસે અનરાધારે અંધારે ઘનઘોર;

અમથાં પીધાં ઝળઝળિયાં ને નજરું પીધી નંઈ,

સખી! હું સોળ વરસની થઈ…

શમણાં રોપ્યાં ઉંબરિયે ઓસરિયે ઊગ્યાં વેણ,

જીવતર ઢાળ્યાં પાંગતમાં ઓશીકે ઉઘડ્યાં નેણ;

વાવડ લીધા પડખાંમાં ને અટકળ લીધી નંઈ,

સખી! હું સોળ વરસની થઈ…

podhan diidhaa makhmalnaan