પિયુજી, આઘ્ઘા રે’જો...

ચૈતરની ડાળીયે ચડતાં પૂર પિયુજી, આઘ્ઘા રે’જો

અમને લીલાં ઘેન કરે ઘેઘૂર પિયુજી, આઘ્ઘા રે’જો

અમે પિયુજી...

તમે પિયુજી, જંગલની લીલીકચ ઝૂલતી કળી

ઝાકળથી ધોયેલી મખમલ સવાર અમને મળી

કાચી કાચી સુગંધથી ભરપૂર પિયુજી, આઘ્ઘા રે’જો

તમે પિયુજી...

તમે પિયુજી, એનઘેન અંધારું ભીતર ભરો

કાળમીંઢ પથ્થરની છાતીને ઊંચકતા ફરો

અમે ઊગતાં થાશો ચૂરેચૂર પિયુજી, આઘ્ઘા રે’જો

અરે પિયુજી...

અરે પિયુજી, જરાક અમથા હડદોલે નંદવાશે

તલાવડી હું, કાચી ઉંમર પાળ તૂટતી જાશે

ધસમસ તાણી જાશું તમને દૂર પિયુજી, આઘ્ઘા રે’જો

ચૈતરની ડાળીએ વધતાં પૂર પિયુજી, આઘ્ઘા રે’જો

અમને ઝીણાં ઘેન કરે ઘેઘૂર પિયુજી, આઘ્ઘા રે’જો

piyuji, aghgha re’jo