ફળિયામાં રોપી છે કેળ

ફળિયામાં રોપી છે કેળ,

સૈ, હવે કૂંપળ ફૂટવાની થૈ વેળ.

આંખોને શણગારી લાભ-શુભ આંજીને

ખુલ્લાં મેલ્યાં છે કમાડ,

સોળ સોળ વરસોથી ગોરંભ્યા આભમાં

થાતો ઝીણેરો ઉઘાડ,

અવસરના દોમ દોમ અજવાળે ઝબકે છે,

ભીતરની અંધારી નેળ...

ફાગણના ફાગ કોઈ ગાતું ને સંભળાતાં

શંકર-પારવતીનાં ગાણાં,

પરદેશી પંખીને પિયરના આંગણમાં

નાખું છું દિવસોના દાણા,

ઘડી કોઈ સાફો ને ઘડી કોઈ ઘરચોળા

વચ્ચે થઈ જાય સેળભેળ...

સપનાંઓ સીંચી ઉછરેલી લાગણીએ

વૈશાખી ફૂલ એક મ્હોરતું,

પાછલી પરોઢ ભીના વાયરાની સંગાથે

આવીને કોણ મને ચોરતું,

મેંદી મૂકેલ મારી જમણી હથેળીમાં

ઊપસ્યો છે મરમાળો મેળ...

phaliyaman ropi chhe kel