રેખ્તા
હિન્દવી
સૂફીનામા
રાજસ્થાની
અવળે હાથે રાસરચીલું મેલ્યું સૈયર
avale haathe raasrachiilun melyun saiyar
મનોહર ત્રિવેદી
મનોહર ત્રિવેદી
અવળે હાથે રાસરચીલું મેલ્યું સૈયર, શેય જડે નઈં
આભે નીકળી તારલિયાની ટમટમતી કૈં વેલ્યું સૈયર, શેય જડે નઈં
સાસુજી પૂછશે કે : ચૂલો કેમ નથી સળગાવ્યો (ઑય મા)
સંજવાળીમાં સાંજ ઢળે ઈ દોરો ક્યાં મંતરાવ્યો? (ઑય મા)
પડોશની બાયું પણ લાવી ભરી નદીથી હેલ્યું સૈયર, શેય જડે નઈં
ઝડકો ભરતાં અજાણતાં હું ભોંકી બેઠી સોય (ઑય મા)
ટેરવડે ટશિયા ફૂટ્યા : ઝળઝળિયાં ટપક્યાં ભોંય (ઑય મા)
અણોસરી વાતું આણીપા કેણે રે ધકેલ્યું સૈયર, શેય જડે નઈં
જેઠાણીનું નામ લઈ છેડે મેં વાળી ગાંઠ (ઑય મા)
સીમેથી ફળિયામાં ઊતર્યો ઘૂઘરિયાળો ઠાઠ (ઑય મા)
જડ્યું જડ્યું : કે’તા મોજીલે કમાડ આઘું ઠેલ્યું સૈયર, શેય જડે નંઈ
સ્રોત
- પુસ્તક : છુટ્ટી મૂકી વીજ (પૃષ્ઠ ક્રમાંક 30)
- સર્જક : મનોહર ત્રિવેદી
- પ્રકાશક : લજ્જા પબ્લિકેશન
- વર્ષ : 2012
- આવૃત્તિ : દ્વિતીય આવૃત્તિ