રેખ્તા
હિન્દવી
સૂફીનામા
રાજસ્થાની
ઓરા આવો તો અમે મળીએ
ora aawo to ame maliye
મનહર તળપદા
મનહર તળપદા
ઓરા આવો તો અમે મળીએ અણવરજી
ઓરા આવો તો અમે મળીએ
કેસરિયા પાઘ ઉપર ચળીએ અણવરજી
ઓરા આવો તો અમે મળીએ.
લીલેરા વનમાં લીલેરાં ગીત મારાં
ઊડે પટોળાને કોર
આષાઢી માસના વાવડ ઝીલીને મારા
ટહુક્યા કળાયલ મોર!
શું વળી વળીને આંખ ઢળિયે અણવરજી
ઓરા આવો તો અમે મળીએ.
સાત સમંદર પારેથી આભલે
દરિયાઉં ગીતડાં વાય
લીલાં નાઘેર અમે પાળેલાં શમણાં
ઊંબરિયે ઝીલ્યાં ના જાય!
શમણાં પાળીને લાજી મરીએ અણવરજી
ઓરા આવો તો અમે મળીએ.
લીલમ જડેલી લીલેરી ચૂંદડીને
નથડી આંદલિયાની કોર,
નીલમપંખીની આંખોનાં નેહભર્યાં
અંજન લાવો જો એક ફોર!
તો ઊલટથી આજ અમે વરીએ અણવરજી
ઓરા આવો તો અમે મળીએ.
સ્રોત
- પુસ્તક : ભીનાં અજવાળાં (પૃષ્ઠ ક્રમાંક 59)
- સર્જક : મનહર તળપદા
- પ્રકાશક : રૂપાલી પબ્લિકેશન
- વર્ષ : 1980