ઓરા આવો તો
Ora Aavo To
અનિલ જોશી
Anil Joshi

ઓરા આવો તો વાત કરીએ માણસજી
આઘાની વાત બધી ઓરી : લે બોલ!
અમે આવીને ગામને ઉતારે માણસજી
હોંકારો નાનકડો માગીએ : લે બોલ!
અમે વીજળીને એક ઝબકારે માણસજી
આખી રામાયણ વાંચીએ : લે બોલ!
અમે પાદરની ખાંભીએથી જોયા માણસજી
ધિંગાણા ધણ થઈ છૂટતા : લે બોલ!
અમે ડેલીએથી ઊતરતાં બેડાં માણસજી
પાણિયારે પહોંચીને ફૂટતાં : લે બોલ!
અમે ઉંબરે પડેલ સંજવારી માણસજી
મે’લીને કોઈ ગયા ચાલી : લે બોલ!
અમે ડાયરા ભરીને ક્યાંક બેઠા માણસજી
ડાયરાઓ તોય રહ્યા ખાલી : લે બોલ!
અમે એકવાર ગામડે ગયા’તા માણસજી
ખેતરે જરીકવાર અડકી : લે બોલ!
અમે બંધ જોઈ શેરી વટાવી માણસજી
રાવજી પટેલની ખડકી : લે બોલ!
અમે લાખવાર આવીને જાતા માણસજી
જાતરા હજીય છે અધૂરી : લે બોલ!
અમે જુગ જુગના વણઝારા માણસજી
આટલેથી વાત હવે પૂરી : લે બોલ!



સ્રોત
- પુસ્તક : કવિતા - ઑક્ટોમ્બર, 1968 (પૃષ્ઠ ક્રમાંક 29)
- સંપાદક : સુરેશ દલાલ
- પ્રકાશક : જન્મભૂમિ પ્રકાશન, મુંબઈ