રેખ્તા
હિન્દવી
સૂફીનામા
રાજસ્થાની
યશવંત ત્રિવેદી
ઓ ગંગા, વહી જાઓ!
મારા હિમાલયો નીચે પીગળતા
સૂરજનાં સોનેરી ઝરણાં લઈ જાઓ!
મારા જનમજનમના હરકી પેઢીના
તરતા દીવાની તરણી વહી જાઓ!
ઓ ગંગા, લઈ જાઓ!
સાગસીસમના જંગલમાં અંધારી રાતે
સિંહવાઘની ત્રાડ થકી સરવરજલમાં
તરડાતો ભૂખર કંપ
કે મધરાતે સાત સમંદર પાર કરીને ફૂલપરીના સપનાની
ધોળી ધોળી બિછાત ઉપર લો જાય નીંદરી લીલો લીલો જંપ
ઓ ગંગા, મારા ભટૂરિયાની મુઠ્ઠીની એકાદ નદીના વેકુરિયા
આદિજળમાં લેલૂમ ઊગેલાં તરબૂચોને વહી જાઓ!
ઓ ગંગા, લઈ જાઓ!
કમખાના બબ્બે પપીહરા, બે પપીહરાના કેસરને જ્યાં...
મયૂરના ટૌકાની લીલી વાડ કૂદીને
આંગળીઓને ઊગી ગયા ગુલમો’ર.
ખોબાના કેસરજલમાં રે રોજ થીરકતી નૈનમછલીઓ
કેસરિયા કાંઠાની રે ઓ પાર હવે...
ઓ ગંગા, મારા સપ્તરંગના
રંગધનુથી કેસરીયો આ, વહી જાઓ!
ઓ ગંગા, લઈ જાઓ!
ગંગાઘાટે હું જ તે મારા અસ્થિનો લઈ કુંભ ઊભો છું
ઓ ગંગા, લહર લહર થઈ આવો!
મારા જન્મજન્મની રાખ તણી ભૂરાશ લઈ વહી જાઓ!
-મારા હિમાલયો નીચે પીગળતા
સૂરજનાં સોનેરી ઝરણાં વહી જાઓ!
રે ગંગા, વહી જાઓ!
સ્રોત
- પુસ્તક : ક્ષિતિજને વાંસવન (પૃષ્ઠ ક્રમાંક 1)
- સર્જક : યશવંત ત્રિવેદી
- પ્રકાશક : વોરા ઍન્ડ કંપની
- વર્ષ : 1971