તને નજરું લાગી છે મારા નામની

ભૂવા જાગરિયાના દોરા તું છોડ,

ન માળા ફેરવ સીતારામની;

તને નજરું લાગી છે મારા નામની...

લહેરાતા વાળ તારે ખેંચીને બાંધવા

ને દર્પણમાં જોઈ તારું હસવું!

માથે ઓઢીને તારું શેરીમાં ફરવું

ને ઉંબરે બેસીને તારું રડવું!

ઘરનાં તો ઠીક, કાલ ગામ આખું કહેશે -

તું રહી નથી કોઈ હવે કામની.

તને નજરું લાગી છે મારા નામની...

વાસીંદુ કરશે તો છાણવાળા હાથ

તને મહેંદી રંગેલ હવે લાગશે;

ઓચિંતા આંગળીમાં વાગશે ટચાકા

ને કેટલીયે ઇચ્છાઓ જાગશે!

વાડીએ જવાનું કોઈ બહાનું કરીને હવે,

કેડી પકડી લે મારા ગામની!

તને નજરું લાગી છે મારા નામની...

tane najarun laagii chhe maaraa naamnii