કંઈ વાત કહો

કંઈ વાત કહો

તમારા કિયા દેશ દરવેશ?

હો અવધૂત, દિયો દિયો કો અણસુણ્યો આદેશ

આ દુનિયાના નવે ખંડથી

દશમ ખંડ શું ન્યારો?

આ જગ કેરા ખટરસથી શું

સપ્તમ રસ કો પ્યારો?

તમોએ પીધ પરમ રસ ખરો?

અરે કંઈ વાત કહો, દરવેશ!

અહીં અમારા અલકમલકથી

અધિક કમલ શું કોક?

રત્નજડિત અમ નગરચૉકથી

ચડિયાતો કો ચૉક?

તમોએ સગી નજરથી દીઠ?

અરે, કંઈ વાત કહો, દરવેશ!

અહીં અમારા હિમશૃંગોથી

ઉન્નત શું કદી શૃંગ?

આ અમ રંગભવનથી મધુરો

બાજે ક્યહીં મૃદંગ?

તમોએ સુણ્યો શું કાનોકાન?

અરે, કંઈ વાત કહો, દરવેશ!

અમ ધખ ધખ આ અંતરથી શું

અધિક રહી કો આગ?

આ મૃત્યુની ભોમ અરથ કો

અમરતિયો સોહાગ?

મળ્યો કો દાતા હાથોહાથ?

અરે, કંઈ વાત કહો, દરવેશ!

kanii vaat kaho