મોસાળમાં ગાવાનું ગીત પૃથ્વી રૂપી છાબ વિષે

પૃથ્વી રૂપી છે છાબડી, ભરિયાં પાનને ફૂલ;

સર્વે ધાતુવડે સજી, મુખથી થાય ન મૂલ.

રાય છબીલી રે છાબ છે.

જોત જવાહીરની ઝગમગે, અગણિત વિધિના આકાર;

ચૈતનમય ચિત્રો ચીતરાયાં, પશુ પંખી નરનાર. રાય...

હોય કટોરા રે નીરના, એવા સાગર અનેક;

મેવા મન માન્યા માંહી છે, છબિયે હદ વાળી છેક, રાય...

સાળુ શેલાં ને સાડિયો, સરસ દુશાલા સહિત;

વસ્ત્રો વિધવિધ વર્ણનાં, પેખી ઉપજે છે પ્રીત, રાય...

ગુણમય ગુચ્છ ગુલાબના, ચંપા ચંબેલી જાય;

મનહર ડમરો ને મોગરો, ગણતાં ગણી ન શકાય, રાય...

જુગતિ જોતાં જન જાતને, ચિતમાં ઉપજે વિચાર;

કારીગર એનો કોણ છે, ડહાપણનો ભંડાર. રાય...

હાથી ઘોડા ને હંસ છે, મેના પોપટ ને મોર;

છબિયો મૂકી છે છાબમાં, ચાતક કોયલ ચકોર, રાય...

જે જે વસ્તુઓ જાણિયે, તે છે તેમાં તમામ;

ધ્યાન ધરે એના ઈશનું, દીલમાં દલપતરામ, રાય...

mosal ma gava nu geet prithvi rupi chhab vishe