મોગરાની કળી

મોગરાની કળી

મોગરાની કળી

મને બગીચામાં મળી...

એને બોલાવી તો એણે ઝાલી મારી આંગળી

મારી સામે ડળક ડળક હસી પડી

હથેળીમાં ચળક ચળક લચી પડી

ભોળી ભોળી ગંધ એની સાંભળી મેં સાંભળી

મારાં ટેરવાંને ચૂમી લીધાં એણે

આખા બગીચાના ડંખ દીધા એણે

ઊતરડી લીધી મારી આખે આખી કાંચળી

ભાંગ્યા તૂટ્યા શ્વાસો મારા ખરી પડ્યા

વાંકાંચૂંકાં સપનાંઓ ખરી પડ્યાં

ખરખર ખરી પડી આંખો મારી આંધળી

મારાં પોપચાંને કાંઠે દીવો ઊગ્યો

પછી રેલંરેલા લોહી સુધી પૂગ્યો

મને મારી વાણી મળી પાણીથીયે પાતળી

Mogra Ni Kali