રેખ્તા
હિન્દવી
સૂફીનામા
રાજસ્થાની
હા રે અમે ફૂલ નહીં રંગના ફુવારા
કે ગંધના ઉતારા
કે વાયરે ઝૂલી પડ્યા : લે બોલ!
હા રે અમે હરણોના પગ્ગની ઉતાવળ
સુગંધની પાછળ
કે રાનનાં ઝૂરી મર્યા : લે બોલ!
હા રે અમે સરનામું વગ્ગરના કાગળ
કે ઊડીએ આગળ
કે હાથમાં ફરતા થયા : લે બોલ!
હા રે અમે મીરાં તે બાઈના ગાયા
પવનમાં વાયા,
કે ફૂંકમાં ખરતા ગયા : લે બોલ!
હા રે અમે ટહુકામાં તરફડતી કોયલ
કબીરની જોયલ
કે ગીતને આંબે બોલે : લે બોલ!
હા રે અમે ફોરમના પડછાયા જોયા
કે ધોધમાર રોયા
કે ચડતા લાંબે ઝોલે : લે બોલ!
હા રે અમે ઊડતી પતંગના ઝોલા
નૈ હાથમાં દોરા
કે આભમાં ગોથે ચડ્યા : લે બોલ!
હા રે અમે સેવ્યા વગ્ગરનાં ઈંડાં
કે લંબગોળ મીંડા
કે રામને ઓથે પડ્યાં : લે બોલ!
હા રે અમે શાયરના કંઠથી છૂટ્યા
કે લયમાં તૂટ્યા
કે ગીતની અધૂરી કડી : લે બોલ!
હા રે અમે છાકટાં છકેલ કોઈ છોરાં
દેખાઈએ ઓરાં
કે વાતમાં દૂરી પડી : લે બોલ!
હા રે અમે ફૂલ નહીં રંગના કુવારા
કે ગંધના ઉતારા
કે વાયરે ઝૂલી પડ્યા : લે બોલ!
સ્રોત
- પુસ્તક : કદાચ (પૃષ્ઠ ક્રમાંક 26)
- સર્જક : અનિલ જોશી
- પ્રકાશક : રૂપાલી પબ્લિકેશન
- વર્ષ : 1987