મારા ઘરમાં તારો દીવો...

મારા ઘરમાં તારો દીવો તારા ઘરમાં મારો,

હું ને તું રાખીને બેઠાં સૂરજનો સહિયારો...

મેં તારી વાડીમાં વાવ્યા તકલાદી પડછાયા,

તેં સીંચીને કરી જીવતી ધબકારાથી કાયા;

ચાંદરણું લઈ મારું, દીધો તેં કિરણોનો ભારો.

હું ને તું રાખીને બેઠાં સૂરજને સહિયારો...

મેં આપેલી એક કાતળી અમથી રોપી કૂંડે,

પછી ગળ્યો ઘુઘવાટ થયો તારામાં ઊંડે ઊંડે;

તારા દરિયે ફરી વળ્યો મારો પરસેવો ખારો.

હું ને તું રાખીને બેઠાં સૂરજને સહિયારો...

તું ઝાકળથી લખતી મારા જીવતરનું સરનામું,

હું પલળેલી ટપાલમાં મોકલતો વાદળ સામું;

બંને જોતાં ટગર ટગર બંનેનો પહેલો વારો,

હું ને તું રાખીને બેઠાં સૂરજને સહિયારો...

mara ghar ma taro divo...