મને લાગ્યો નઠારા સંગ નેડો

મને લાગ્યો નઠારા સંગ નેડો,

ફલકુને તીર ભરી પાણીડાં, આવતી’તી,

રોક્યો રૂપાળે મારો કેડો!

કે મને લાગ્યો નઠારા સંગ નેડો!

એણે વાતુંવાતુંમાં મને છેતરી,

મને દામણ દીધું કે દીધી નેતરી,

પછી ચારેબાજુથી મને વેતરી,

સિવાતી ગઈ એના ટેરવાંના ટેભલે

જડિયો ના ક્યાંય મને છેડો!

અલી, એવી તે કાંઈ ન’તી ભોળી,

મુને આંખ્યુંના ત્રાજવામાં તોળી,

પછી વાતું કરી’તી મીઠામોળી,

કોણ જાણે સૈ! પછી થઈ ‘ગ્યું છે શું?

મને લાગી ‘ગ્યો એક એનો હેડો!

ગોરંભા જેમ ચડ્યો માગશરનો ઠાર,

આંખ્યું ને લાગે છે પાંપણનો ભાર,

મધમીઠો કેમ મને લાગે અંધાર?

વહેલી સવારના ઝબકીને જાગી તો–

મ્હેક થકી મઘમઘતો મેડો!

Mane Lagyo Nathara Sang Nedo