રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
માછીડા! મછવો મેલજે રે જલધિ-જંગલે,
મધદરિયે મછલી મળી હો જી!
એ જી મછલીનું મારણ મોતિયુંનું–
જ્યોતિયુંનું એવું રે
ઝીંક જાળ તું ઘડી બે ઘડી હો જી!
એ જી માછીડા!
મનડું મોટું ને મેરામ મોટો રે
ખૂટલ ના હોય ખારવો હો જી!
એ જી દરિયાની મોસમ–
ભરતી ને ઓટ અંકાણી રે
માછીડે મધગાળો મારવો હો જી!
એ જી માછીડા!
ધરતીનભના હો મળતા છેડા રે
જલવન જાગતા કેડા રે હો જી!
તૂટલ હલ્લેસાં હંજા હોય હોય ના! વીરા રે,
નાંગરવા તોય બેડા રે હો જી!
એ જી માછીડા!
અથોક સલિલ-સથવારા ભેળા રે
મછલી ને જાળ શું છે નેડા રે હો જી!
એ જી તવલો જીવડો ધ્રપે ના–
સ્થિર રહી તીર રે,
માયલી એ મછલીનાં તેડાં રે હો જી!
સ્રોત
- પુસ્તક : સોહમ્ (પૃષ્ઠ ક્રમાંક 40)
- સર્જક : દામોદર ભટ્ટ ‘સુધાંશુ’
- પ્રકાશક : પોતે
- વર્ષ : 1960