લીલ્લીછમ લાગણીનું ગીત

લીલ્લીછમ લાગણીને આપજો ન કોઈ હવે,

સુક્કા સમ્બન્ધ કેરું નામ.

મ્હોરતાં ફોરતાં ને પળમાં આસરતાં આ

શબનમ જેવો છે સમ્બન્ધ,

સમણું બનીને ચાલ્યા જાવ તોય યાદનાં

આંસુ તો રહેશે અકબંધ.

પ્રીત્યું તો હોય સખી એવી અણમૂલ એનાં

કેમ કરી ચૂકવવાં દામ?

સગપણના મારગમાં ઊગ્યા તે હોય ભલે

આજકાલ હાથલિયા થોર,

આંખોના કાજળને દૂર કરી દેખીએ તો

અમને એ લાગે ગુલમ્હોર.

અચરજ એવું કે સખી ભૂલી બેઠી હું પછી

મારુંયે સાવ નામ-ઠામ.

lillichham lagninun geet