કૂંચી

કૂંચી

કહોને કૂંચી કોઈને જડી?

હુંય અભાગી, કરી ઉતાવળ

અવળે હાથે પડી... કહોને...

આ રે પટારો, અજબ, અનોખો,

એનું અજાયબ તાળું;

સઘળી કૂંચી અજમાવી તોયે,

નથી ઉઘડવાવાળું,

એ એવી તો અસલ, અજોડી,

બીજી નથી કોઈ ઘડી... કહોને...

હરદમ એને હૈયે રાખી,

જતન કર્યું હરઘડી;

અણગમતી, અણધારી આવી

આફત અઘરી પડી;

નાની તો પણ નજરાણામાં

એ સૌનાથી વડી... કહોને...

પરમ પદારથ, પાયો પારસ

પુનિત પુણ્ય પ્રતાપે;

હીરા, માણેક, રતન અમૂલાં

આપું, શોધી આપે;

દઉં ઓવારી જીવતર 'બાબુ’

માંગે મોઢે ચડી... કહોને...

kuunchii