રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
કોણ રોકે!
kon roke!
સ્નેહરશ્મિ
સ્નેહરશ્મિ
આ પૂનમની ચમકે ચાંદની,
એને કોણ રોકે!
કાંઈ સાયર છલક્યા જાય
કે એને કોણ ટોકે!
આ આષાઢી વરસે મેહુલો,
એને કોણ રોકે?
કાંઈ પૃથિવી પુલકિત થાય,
કે એને કોણ ટોકે!
આ વસન્તે ખીલતાં ફૂલડાં!
એને કોણ રોકે?
કાંઈ ભમરા ગમ વિણ ગાય,
એને કોણ ટોકે!
આ આંબે મ્હોરતી મંજરી,
એને કોણ રોકે
કાંઈ કોકિલ ઘેલો થાય,
કે એને કોણ ટોકે!
આ અંગે યૌવન પાંગરે,
અને કોણ રોકે?
કાંઈ ઉરમાં ઉર નહિ માય! —
કે એને કોણ ટોકે!
સ્રોત
- પુસ્તક : સકલ કવિતા (પૃષ્ઠ ક્રમાંક 144)
- સર્જક : સ્નેહરશ્મિ
- પ્રકાશક : વિદ્યાવિહાર પ્રકાશન
- વર્ષ : 1984