કોઈ રસ્તાની ધારે ધારે

કોઈ રસ્તાની ધારે ધારે બેસી સાંજ સવારે

તારી રાહ જોઉં છું.

ઊડતાં ઊડતાં પંખીઓ પણ તારું નામ પુકારે

તારી રાહ જોઉં છું.

તારું નામ લઈને આભે સૂર્યોદય પણ થાતો

સૂરજ તારું નામ લઈને સાંજે ડૂબી જાતો.

કદીક આવશે તું : એવા અગમના અણસારે

તારી રાહ જોઉં છું.

વનની કેડી વાંકીચૂંકી : મારી કેડી સીધી.

મેં તો તારા નામની મીઠી કમલકટોરી પીધી

રાતની નીરવ શાંતિ : એના રણઝણતા રણકારે.

તારી રાહ જોઉં છું.

Koi Rasta ni Dhare Dhare