રેખ્તા
હિન્દવી
સૂફીનામા
રાજસ્થાની
ખુશ્બો મૂકી જાય
khushbo muki jay
રતિલાલ છાયા
રતિલાલ છાયા
આવી આવી દ્વારે મારે
ખુશ્બો મૂકી જાય!
પ્રિયા ખુશ્બો મૂકી જાય!
૧
કુમકુમ ઝરતી પગલી એની,
પાની ના ઝંખાય;
સ્મિતથી વીજળી ચમકે પાસે,
નયણાં ના દરશાય!
પ્રિયા ખુશ્બો મૂકી જાય! – આવી આવી.
ર
નીલ આકાશે ઓઢણી ઊંડે,
દેહ ના દેખાય,
રત્નજડિત ઉડુની માળા,
કંઠ ના ડોકાય!
પ્રિયા ખુશ્બો મૂકી જાય! – આવી આવી.
૩
પુષ્પડાળે વેણી રે ઝૂલે,
કેશ ના કલ્પાય!
ઉરનો અળતો ઊછળે આભે,
હૈયું ના હેરાય!
પ્રિયા ખુશ્બો મૂકી જાય! – આવી આવી.
૪
દિવસે આવે, રાત્રે આવે;
સ્હેજ ના સ્પર્શાય!
તો ય એની નૌતમ લીલા,
અંતર આંજી જાય!
પ્રિયા ખુશ્બો મૂકી જાય! – આવી આવી.
સ્રોત
- પુસ્તક : આપણી કવિતાસમૃદ્ધિ (ઉત્તરાર્ધ) (પૃષ્ઠ ક્રમાંક 103)
- સંપાદક : ચન્દ્રકાન્ત ટોપીવાળા
- પ્રકાશક : ગુજરાતી સાહિત્ય પરિષદ
- વર્ષ : 2004