રેખ્તા
હિન્દવી
સૂફીનામા
રાજસ્થાની
ખરા બપોરે
KHaraa bapore
જયન્ત પાઠક
જયન્ત પાઠક
ખરા બપોરે સૂરજ વરસે ગગનભરીને તડકો
મોટે ફોરે મુશળધારે ગઈ ગોબાઈ સડકો;
તડકાના ધગધગ રેલામાં શેકાતી છાયાઓ
છળતી છલકાતી મલકાતી મૃગજળની માયાઓ;
આંખો મીંચી લથપથ ઊભાં મકાન ઝડીઓ ઝીલી
પડ્યું પવનનું પંખી હાંફે પલળી પાંખે ઢીલી;
નગર વચોવચ રમણ ચડ્યાં શાં પીળી નદીનાં પાણી
રડ્યાંખડ્યાં વાહન ને પગલાં જાય લોકનાં તાણી!
દશે દિશાની ચઢી રેલમાં ડૂબી નગરની વસ્તી
ભડકે બળતી એકલ હોડી શી હૈયાની હસ્તી.
સ્રોત
- પુસ્તક : કવિતા : જુન 1985 (પૃષ્ઠ ક્રમાંક 31)
- સંપાદક : સુરેશ દલાલ
- પ્રકાશક : જન્મભૂમિ પ્રકાશન, મુંબઈ