રેખ્તા
હિન્દવી
સૂફીનામા
રાજસ્થાની
ધગધગતું રણ મળ્યું
dhagadhagatun ran malyun
રમણીક સોમેશ્વર
રમણીક સોમેશ્વર
ધગધગતું રણ મળ્યું
ચડી ઊંટની પીઠ ઉપર આકાશ આંખમાં ભર્યું
અમને ધગધગતું રણ મળ્યું
કેમ કરીને આપું ઓળખ
અમે રેતના ઢૂવા
વણઝારાની પોઠ માગતી
રણની વચ્ચે કૂવા
સૂકા ઘાસની સળી જેમ આ જીવતર આખું સર્યું
અમને ધગધગતું રણ મળ્યું
મળ્યા દિવસના તાપ
રાતનું ટાઢોડું, સન્નાટો
પ્રલંબ રેતીના પટ વચ્ચે
ક્યાં મારગ, ક્યાં ફાંટો
દરિયો આખો માગ્યો, ત્યારે બુંદ એક ઝરમર્યું
અમને ધગધગતું રણ મળ્યું.
સ્રોત
- પુસ્તક : ગુજરાતી કવિતાચયન 1998 (પૃષ્ઠ ક્રમાંક 43)
- સંપાદક : જયદેવ શુક્લ
- પ્રકાશક : ગુજરાતી સાહિત્ય પરિષદ
- વર્ષ : 2001