કેડી

કેડી

જોતાં જોતાં અમને કેડી રે લાધી

વંકાતી જાય આઘી આઘી રે;

ભમતાં ભભતાં અમને કેડી રે લાધી,

જીવનની ખીણમાં ઝંખાતી રે,

એવી એવી અમને કેડી રે લાધી.

વચ્ચે વચ્ચે રે શીળા બાંધ્યા વિસામા

પંથીના થાક પરમાણી રે;

એવી એવી અમને કેડી રે લાધી.

પરબું બેસાડી કોણે મારગના વાંકમાં

તરસ્યાંની આરત જાણી રે?

ભમતાં ભમતાં અમને કેડી રે લાધી.

માંડ્યાં સદાવ્રત કૈંક મહાવ્રતીએ,

આતમને આજ ઉજાણી રે;

એવી એવી અમને કેડી રે લાધી.

પૂરવ – પ્રવાસી કેરી પ્રગટ પનોતી

ભાવિને ર્હેતી ઉજાસી રે;

ભમતાં ભમતાં અમને કેડી રે લાધી.

કોણ જોગી ને વળી કોણ રે સંસારી?

સહુ કોઈ મારગ – પ્રવાસી રે;

જાગી જાગીને કોઈ ભાગે છે હંસલા,

સૂતા છે કૈંક અભાગી રે;

એવી એવી અમને કેડી રે લાધી.

જીવનની જ્યોતિયે ઝંખાતી રે;

ભમતાં ભમતાં અમને કેડી રે લાધી.

kedi