ચંપાંબા ચીત ચાહીને, નિરખો સાસર વેલ;

લાયક વસંત લાવેલ, ઓઢો ચળકતી ચુંદડી;

ચુંદડી છે ચોખા હીરની, વણકર ડાહ્યે વણેલ,

રંગરેજે રંગેલ, ઓઢો ચળકતી ચુંદડી.

ચુંદડીમાં બહુ ચિત્ર છે, ભભકાદાર છે ભાત;

જોવા ઇચ્છે જન જાત, ઓઢો ચળકતી ચુંદડી;

ચુંદડી તો ચારે મુલકમાં, પ્રથવી પર છે પ્રખ્યાત;

વેદ વરણવે છે વાત, ઓઢો ચળકતી ચુંદડી.

જેમાં બુટ્ટા જરિયાનના, ઝગમગ ઝગમગ થાય;

દેખી દીલ હરખાય, ઓઢો ચળકતી ચુંદડી;

મ્હેકે છે પડો પાનડી, સોરંભ સારી પસરાય;

ભમરા તેથી લોભાય, ઓઢો ચળકતી ચુંદડી.

ચીતરનારે તે ચુંદડીમાં, ચીતરી છે રાશિ બાર;

અમરવેલ આકાર, ઓઢો ચળકતી ચુંદડી;

ચીતર્યા સૂરજ ને ચંદ્રમાં, ચીતર્યા પુષ્પ અપાર;

મનહર ચુંદડી મોઝાર, ઓઢો ચળકતી ચુંદડી.

સોનૈયા સવા લાખનું, ગણતાં મૂલ ગણાય;

એતો અનુમાન થાય, ઓઢો ચળકતી ચુંદડી;

સદગુણ ચુંદડીના સર્વથા, જીભે ઉચર્યા ન જાય;

લખતાં પણ ન લખાય, ઓઢી ચળકતી ચુંદડી.

છબીલી ચુંદડીના છેડલા, મેલો ઢળકતા ચાર;

શોભે સરસ શણગાર, ઓઢો ચળકતી ચુંદડી;

ચુંદડીવાળી ચતુરાં તને, આપે આયુષ્ય અપાર;

જગતમાં જગકરતાર, ઓઢો ચળકતી ચુંદડી.

ચુંદડી સાથે છે ચળકતા, સારા શોળે શણગાર;

હીરા મોતીના હાર, ઓઢો ચળકતી ચુંદડી;

ઘુઘરવટનો છે ઘાઘરો, ઘુઘરીનો ઘમકાર,

ઝાંઝરનો ઝમકાર, ઓઢો ચળકતી ચુંદડી.

સુફળ મનોરથ સર્વદા, તારા થાજો તમામ;

કરજો પરમારથ કામ, ઓઢો ચળકતી ચુંદડી;

ઉરથી આશિષ એટલી, દે છે દલપતરામ,

પ્રભુને કરીને પ્રણામ, ઓઢો ચળકતી ચુંદડી.