કંકુ ખર્યું ને સૂરજ ઊગ્યો

માડી તારું કંકુ ખર્યું ને સૂરજ ઊગ્યો

જગ માથે જાણે પ્રભુતાએ પગ મૂક્યો

કંકુ ખર્યું ને સૂરજ ઊગ્યો

મંદિર સરજાયું ને ઘંટારવ ગાજ્યો,

બ્રહ્મનો ચંદરવો માએ આંખ્યુંમાં આંજ્યો,

દીવો થાવા માટે મંદિરનો ચાંદો આવી પૂગ્યો

કંકુ ખર્યું ને સૂરજ ઊગ્યો

માવડીની કોટમાં તારાનાં મોતી

જનનીની આંખ્યુંમાં પૂનમની જ્યોતિ

છડી રે પુકારી માની મોરલો ટહુક્યો

કંકુ ખર્યું ને સૂરજ ઊગ્યો

નોરતાંના રથના ઘૂઘરા બોલ્યા

અજવાળી રાતે માથે અમૃત ઢોળ્યાં

ગગનનો ગરબો માનાં ચરણોમાં ઝૂક્યો

કંકુ ખર્યું ને સૂરજ ઊગ્યો.

kanku kharyun ne suraj ugyo