રેખ્તા
હિન્દવી
સૂફીનામા
રાજસ્થાની
કાળ-સૈન્ય આવ્યાં
kal sainya awyan
ઝવેરચંદ મેઘાણી
ઝવેરચંદ મેઘાણી
અમે ખેતરથી, વાડીઓથી,
જંગલ ને ઝાડીઓથી
સાગરથી, ગિરિવરથી,
સુણી સાદ આવ્યાં.
અમે કંટકનો પુનિત તાજ
પહેરી શિર પરે આજ,
પીડિત દલિતોનું રાજ
રચવાને આવ્યાં.
અમે જુગજુગ કેરાં કંગાલ
માંગી નરકોનાં દ્વાર
દેતાં ડગ એક તાલ
ધરણી પર આવ્યાં.
અમે નૂતન શક્તિને ભાન
નૂતન શ્રદ્ધાનું ગાન
ગાતાં ખુલ્લી જબાન
નવલા સૂર લાવ્યાં.
દેખ દેખ, ઓ રે અંધ!
કાળ-સૈન્ય આવ્યાં.
સ્રોત
- પુસ્તક : સોના નાવડી (પૃષ્ઠ ક્રમાંક 129)
- સંપાદક : જયંત મેઘાણી
- પ્રકાશક : ગુજરાત સાહિત્ય અકાદમી
- વર્ષ : 1997