રેખ્તા
હિન્દવી
સૂફીનામા
રાજસ્થાની
જીવતી?
jiivatii?
સોમાભાઈ ભાવસાર
સોમાભાઈ ભાવસાર
ગામડા ગામની છોકરી રે એક જીવતી એનું નામ;
જીવતી એનું નામ, કરે પણ મરતી મરતી કામ.
લટિયાં એનાં લીખ ભરેલાં લૂગડાં મેલાં દાટ;
આજે જો નાહ્ય તો નાહ્ય પછીથી દિવસ વીત્યે આઠ.
જીવતી! તારું જીવતી એવું કોણે પાડ્યું નામ?
કોણ હતી એ ફૂવડ ફોઈ તુજ જીવાપુર ગામ?
વાને કોયલ જેવી તોય ના કંઠમાં કેમ મીઠાશ?
જીવતી રે એલી જીવતી! તારો આવડો કેમ રે ત્રાસ?
જીવતી બોલે : ભાઈ! અભાગી જનમેલી જે દીથી;
ગામડા ગામની છોકરીનો સંસાર ના જાય સુખેથી.
નાનકડી હું બાળ મેં માંડી ત્યારથી ઘરની વેઠ;
પરણીને ગઈ સાસરે જોડી ધણીએ ધૂંસરી હેઠ.
માનાં લાડ મળ્યાં ના મીઠાં, મળી ન બાપની પ્રીત;
પરણ્યાએ કદી પાસ બેસી ના ગાયું જીવનગીત.
જીવતી મારું નામ સાચું પણ જીવતી ના હું ભાઈ;
ગામડા ગામની છોકરીની એવી જીવનની કઠણાઈ.
સ્રોત
- પુસ્તક : પરિવંદના (પૃષ્ઠ ક્રમાંક 68)
- સર્જક : સોમાભાઈ ભાવસાર
- પ્રકાશક : શ્રી લક્ષ્મી પુસ્તક ભંડાર, અમદાવાદ
- વર્ષ : 1976