જાતી'તી મધરાત

જાતી'તી મધરાત

એક આછેરો વીંજણો વાતી,

હળુ હળુ જાતી'તી મધરાત,

આછેરા ગીત કેરી દોરે

હળુ હળુ ગાતી’તી મધરાત.

ફૂલડાંની માળ મારી બેઠી ગૂંથતી હું તો,

દૂરને ડુંગર તારા પાવા વગાડે તું તો,

એક આછેરી હીરદોર લાવી,

ઝુલાવી હો જાતી'તી મધરાત. આછેરો વીંજણો...

પહેલી વસંત મારે પહેલી પ્રીતલડી,

તારા ગણંતી મારી જાગે આંખલડી,

એક આછેરી તારલી ચગાવી,

જગાવી હો જાતી'તી મધરાત. આછેરો વીંજણો...

મોટા હૈયાને મારે એક વાત કહેવી,

નાનેરી પ્રીત, એને મનમાં ન લેવી,

મારાં આંસુમાં આંસુ મિલાવી,

મનાવી હો જાતી'તી મધરાત. આછેરો વીંજણો...

Jatiti Madhrat