જન્મેજય નામે ભાવકને સંબોધન ધ્રિબાંગસુંદરનું

ધ્રિબાંગસુંદર એણીપેર ડોલ્યા, સુણ જન્મેજયરાય જી

ઝાકળની કાયામાં ચળકે નભની ભૂરી ઝાંય જી

અક્ષરના વનમાં આથડતાં ભૂલા પડ્યાનો લ્હાવો રે

ચણોઠડીને અડતાંવેંત જ લાગી ઝળહળ લ્હાય જી

ગઝલકુંવરી, રજકણ રમવા સૂની બપોરે આવો રે

વરિયાળીનું છત્ર ધરી દઉં,ઘડી ધૂપ ઘડી છાંય જી

નવરાં પડતાં બજવ્યો ઘેઘૂર ઇન્ડિપેણનો પાવો રે

સૂર અડકતાં સળ પડશે નિર્જળ કાગળની માંહ્ય જી

કરી કવિતા, સમજણ વચ્ચે કેળ કુંવારી વાવો રે

સપનાં મારાં, ખડિયે અણખૂટ સદાય રહેજો સ્હાય જી

janmejay name bhawakne sambodhan dhribangsundaranun