જાણીબૂઝીને અમે અળગાં ચાલ્યાં

જાણીબૂઝીને અમે અળગાં ચાલ્યાં

ને છતાં પાલવ અડક્યાનો મને વ્હેમ છે,

સાવ રે સફાળા તમે ચોંકી ઊઠ્યા

ને પછી ઠીક થઈ પૂછ્યું કે 'કેમ છે?'

આટલા અબોલા પછી આવો સવાલ

કહો કેમ કરી ઊતરવું પાનું?

મૂંગાં રહીએ તો તમે કારણ માનો, ને

હોઠ ખોલિયે તો બોલવાનું બ્હાનું;

હું તો બોલીશ, છતાં માનશો તમે કે

હજી દુનિયા આ મારી હેમખેમ છે!

વાયરાથી નળિયાને ફૂટી છે પાંખ

થઈ ચાલતી દીવાલ થકી ઈંટો,

ભર રે ચોમાસે હવે છાપરા વિનાનો

કેમ કોરો રહે સ્મરણોનો વીંટો!

દુનિયાની વાત મૂકો, માનશો તમે કે

હજી આપણી વચાળે જરા પ્રેમ છે!

jani buzine ame alaga chalya