હું એવો ગુજરાતી...

હું એવો ગુજરાતી...

હું એવો ગુજરાતી

જેની;

હું ગુજરાતી એ જ વાતથી ગજ ગજ ફૂલે છાતી.…

અંગે અંગે વહે નર્મદા, શ્વાસોમાં મહીસાગર,

અરવલ્લીનો પિંડ પ્રાણમાં ધબકે છે રત્નાકર;

હું સાવજની ત્રાડ, હું જ ગરવી ભાષા લચકાતી…

નવરાત્રિનો ગર્ભદીપ હું, હું શત્રુંજય શૃંગ,

સૂર્યમંદિરે ગુંજરતો હું ધવલ તેજનો ભૂંગ;

હું ગિરનારી ગોખ, દ્વારિકા હું જ સુધારસ પાતી...

દુહા-છંદની હું રમઝટ, હું ભગવું ભગવું ધ્યાન,

મીરાંની કરતાલ હું જ, હું નિત્ય એક આખ્યાન;

વિજાણંદનું હું જંતર, હું નરસૈંની પરભાતી….

હું ગાંધીનું મૌન, હું જ સરદાર તણી છું હાક,

હું જ સત્યનું આયુધ જેની દિગ્દિગંતમાં ધાક;

હું સંતોનું સૌમ્ય સ્મિત, તલવાર શૂરની તાતી…

હું મારી માટીનો જાયો, હું ગુર્જર અવતાર,

મારે શિર ભારતમાતાની આશિષનો વિસ્તાર;

હું કેવળ હું હોઉં છતાં, હું સદા હોઉં મહાજાતિ…

hun aevo gujaraatii...