નવેલી નારનું ગીત

નવેલી નારનું ગીત

સાવ અચાનક અણજાણ્યો આ પહેલો પહેલો સ્પર્શ

સ્પર્શમાં હેત હેતની હેલી

અને પછી તો રોમ રોમ ઝંકૃત હૃદયમાં ધક ધકનો ધબકાર

ધબકતી મારી અંદર નાર નવેલી!

મીઠો મીઠો આંખ ઉલાળો કરતો’તો એ રોજ, મુવાને શું યે સૂઝ્યું

હોઠ મરોડી આંગળીઓ બે અડકાડીને છુટ્ટી ફેંકી બેશરમીથી

અને શરમથી હું તો થઈ ગઈ પાણી પાણી ને અંદરથી

નાચી ઊઠી હું અલબેલી

અણજાણ્યો આ પહેલો પહેલો સ્પર્શ

સ્પર્શમાં હેત હેતની હેલી

હુંયે મૂઈ કંઈ ઓછી નંઈ કે મરક મરક મલકાઈ જરા મેં નજરો ઢાળી

આંગળીઓથી લટ સંકોરી ભુવન મોહિની સમી અદાથી ઉપર જોયું

અને પછી તો અલબેલો એ છેલ છોગાળો થરક થરક થઈ

થરકી ઊઠ્યો અલ્લા બેલી!

રોમ રોમ ઝંકૃત હૃદયમાં ધક ધકનો ધબકાર

ધબકતી મારી અંદર નાર નવેલી!

naveli naarnun giit