હલક શું, છટા શું, જુઓ આ જ માર્દવ, મળ્યાં છે, હળ્યાં છે, ભળ્યાં છે આ પળમાં,

ને સરવર નજર માંડે ભૂરાં નયનથી, ગગનનું પ્રતિબિંબ પડતું આ જળમાં!

મળ્યું છે અહીં જે હતું આ સકળમાં...

આ જલધિ તરંગે ઉમંગે હૃદય છે, નજરમાં પ્રથમ એ મુલાકાત, ફળિયું,

જ્યાં મળવા અગાશી ઉપર હો ગયા ત્યાં, તું ઝૂકી વધારે ને શરમાયું નળિયું!

કરે યાદ સાથે એ કિસ્સા સફરના, નિશાની હજુયે છે એની વમળમાં,

મળ્યું છે અહીં જે હતું આ સકળમાં...

છે ઊગ્યાં ઉભય કૈંક પુષ્પો સુગંધે, સહજ આવી જાને તો રંગો પુરાશે,

ક્ષિતિજે વહે છે સંબંધોની ક્ષિપ્રા, જે આવી કિનારાને ભરતી કુમાશે;

ખીલીને, ખૂલીને અને ભાન ભૂલી, ભલે બંધ થાતો ભ્રમર અહિ કમળમાં!

મળ્યું છે અહીં જે હતું આ સકળમાં...

હલક શું, છટા શું, જુઓ આ જ માર્દવ, મળ્યાં છે, હળ્યાં છે, ભળ્યાં છે આ પળમાં,

ને સરવર નજર માંડે ભૂરાં નયનથી, ગગનનું પ્રતિબિંબ પડતું આ જળમાં!

મળ્યું છે અહીં જે હતું આ સકળમાં...