રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

ભજન કરે તે જીતે

મકરંદ દવે

ભજન કરે તે જીતે

મકરંદ દવે

Roman

વજન કરે તે હારે રે મનવા

ભજન કરે તે જીતે.

તુલસી-દલથી તોલ કરો તો

બને પવન-પરપોટો,

અને હિમાલય મૂકો હેમનો

તો મેરુથી મોટોઃ

આ ભારે હળવા હરિવરને

મૂલવવો શી રીતે!-

રે મનવા, ભજન કરે તે જીતે.

એક ઘડી તને માંડ મળી છે

આ જીવતરને ઘાટે.

સાચ-ખોટનાં ખાતાં પાડી

એમાં તું નહીં ખાટેઃ

સ્હેલીશ તું સાગરમોજે કે

પડ્યો રહીશ પછીતે?–

રે મનવા, ભજન કરે તે જીતે.

આવ, હવે તારા ગજ મૂકી,

વજન મૂકીને વરવાં,

નવલખ તારા નીચે બેઠો

ક્યાં ત્રાજવડે તરવા?

ચૌદ ભુવનનો સ્વામી આવે

ચપટી ધૂળની પ્રીતે-

રે મનવા, ભજન કરે તે જીતે.

સ્રોત

પુસ્તક : ઉત્તરાયણ (પૃષ્ઠ ક્રમાંક 56)
સંપાદક : દીપક મહેતા
પ્રકાશક : નેશનલ બુક ટ્રસ્ટ, ઇન્ડિયા
વર્ષ : 2008