રેખ્તા
હિન્દવી
સૂફીનામા
રાજસ્થાની
હરિ, આવોને!
hari, awone!
સ્નેહરશ્મિ
સ્નેહરશ્મિ
આ ડગમગ ધરતી ડોલતી, હરિ, આવોને!
જગ ખાતું મોત-પછાડ! હરિ, વે'લા આવોને!
ના માનવી માનવી કો રહે, હરિ, આવોને!
આ ઉર આડી વિષ-વાડ, હરિ, વે'લા આવોને!
આ શોણિતે સરિતા ઊછળે, હરિ, આવોને!
કાંઈ ખંડો ડૂબ્યા જાય, હરિ, વે'લા આવોને!
આ વેરની ચોગમ આંધીઓ, હરિ, આવોને!
રે જળથળનભ ઘેરાય, હરિ, વે'લા આવોને!
આ ઓથાર-ચાંપ્યા અન્તરે, હરિ, આવોને!
કંઈ વાતા મંજુલ સૂર, હરિ, વે'લા આવોને!
આ પ્રભુહીણા જગનેણલે હરિ, આવોને!
ગીતામૃતને પૂર, હરિ, વે'લા આવોને!
આ કરમાતી ઉર-કુંજમાં હરિ, આવોને!
તે બુદ્ધને નમણે નેણ, હરિ, વે'લા આવોને!
હવે વરસી શાન્તિની ઝડી, હરિ, આવોને!
હો ઈશુને અમૃત-વેણ, હરિ, વે'લા આવોને!
સ્રોત
- પુસ્તક : સકલ કવિતા (પૃષ્ઠ ક્રમાંક 186)
- સર્જક : સ્નેહરશ્મિ
- પ્રકાશક : વિદ્યાવિહાર પ્રકાશન
- વર્ષ : 1984