રેખ્તા
હિન્દવી
સૂફીનામા
રાજસ્થાની
ન્હાનાલાલ દલપતરામ કવિ
આ વસન્ત ખીલે શતપાંખડી, હરિ! આવોને;
આ સૃષ્ટિએ ધરિયા સોહાગ; હવે તો હરિ! આવોને.
આ વિશ્વ વદે છે વધામણી, હરિ! આવોને;
આવી વાંચો અમારાં સૌભાગ્ય; હવે તો હરિ! આવોને.
આ ચન્દરવો કરે ચન્દની, હરિ! આવોને;
વેર્યાં તારલિયાનાં ફૂલ; હવે તો હરિ! આવોને.
પ્રભુ પાથરણાં દઈશ પ્રેમનાં, હરિ! આવોને;
દિલવારી કરીશ સહુ ડૂલ; હવે તો હરિ! આવોને.
આ જળમાં ઊઘડે પોયણાં, હરિ! આવોને;
એવા ઊઘડે હૈયાના ભાવ; હવે તો હરિ! આવોને.
આ માથે મયંકનો મણિ તપે, હરિ! આવોને;
એવા આવો, જીવનમણિ માવ! હવે તો હરિ! આવોને.
આ ચન્દનીભરી છે તળાવડી, હરિ! આવોને;
ફૂલડિયે બાંધી પાજ; હવે તો હરિ! આવોને.
આ આસોપાલવને છાંયડે, હરિ! આવોને;
મનમહેરામણ મહારાજ! હવે તો હરિ! આવોને.
મ્હારે સૂની આયુષ્યની શેરીઓ, હરિ! આવોને;
મ્હારે સૂની સૌ જીવનની વાટ; હવે તો હરિ! આવોને.
મ્હારા કાળજ કેરી કુંજમાં, હરિ! આવોને;
મ્હારા આતમસરોવરઘાટ, હવે તો હરિ! આવોને.
સ્રોત
- પુસ્તક : વસંતવૈભવ (પૃષ્ઠ ક્રમાંક 16)
- સંપાદક : સુરેશ દલાલ
- પ્રકાશક : પરિચય ટ્રસ્ટ
- વર્ષ : 2006